Vawleicung Laimi hna, Na pawngkam sin ah rak hrawmh ve hna! AA nih Myebone ah Laimi Khuabawi a tuan lio mi an tlaih. Paletwa khua kap Mee Let Wa in minung 600 leng an tli, bom puahnak in minung 3 hliamhma an tuar

A cunglei langhter mi hi, kan nih Chin Miphun Ni, kan umnak hmun cio in, kan rak inuam cukmak lio ah an ton mi a si. [Kawl le Mirang in a tanglei ah tling in rel khawh si. March 2015 in a thawkmi Paletwa peng, Chin miphun kan unau [Khumi, Bawm] nih a temtuarnak caan a sau ko cang. An harsa! Ei awk, din awk an har ko cang! Atu ah, Internet pehtlaihnak an phih tik ah, a felfaimi thawngpang lak le sining hngalhnak caah donkhanhnak a sang chin. Kum 5 chung ah, a tutan hi voihnihnak Internet an phih a si cang.

Ral tuknak ruang ah harsami an tam ko cang. Atu ah, a hnu bik CHRO nih khomsuat khawhmi ning in Hmun (Khua) 16 ah ral ruang ah a zammi 3128 an phan cang (Hi leng in khomh khawhlomi an tam liangluang lai). Nifatin kahdohnak ruang ah a zaza, a thongthong in an tli, an le, an zam cang. Atu ahcun, Paletwa khuapi pawngte Mee Let Wa tiang an phan cang. Ram dang phan, Chin miphun kan unau hna nan Aw-ann nan hman a biapi hrinhran ko. Ka vun in uh hna! Nan pawng, nan umnak cozah sin ah chimrel a biapi tuk.

Paletwa ah a buai ning tluk in, vawleipi theihhngalh in Thawngpang kan chuahter kho lo. An sining dik taktak vawleipi theih in a tialmi le a thanhmi kan um lo khan tluk a si. Ramkomh Kawlram ah, Mitam-u simi Kawl nih an ngeihmi thawngzamhnak, Irrawaddy, Mizzima, Myanmar Times tbk. nih an lung thawh khui ma chel telawng ah an kan tial. Hihi khua fakpi in kan ruah, nan ruah a hau!

Cun, Ka hnachuah bia hna silo. Kachin ramkulh ah, 2011 i kum 17 chung kahdaihnak an tuah hnu i, an i kah than ahkhan, ram kip in Chin miphun nih kan unau pei an si cu tiah, nan rak tang ngaingai. Ramchung, ramleng, nan dir a tha tuk! Bawmhnak tampi a rak chuak, KIA lutlai lei simi tiang Chin miphun biakinn ngan pipi ah biachimnak rak pek a si. Lungthin, Ruahnak, Chawva in bawmh an rak si, a tha tuk ko hringhran!

Nain, atulio ah, kanmah kan coka a Kangh cuahmah lio ah, kan dai ngaingai mi ka lawhter. Hihi kan ruah than cu a cu ngaingai ko cang lo maw? Chinmi Tho Cang! Salai Sang Hnin Lian