Chin ramkulh Kanpalet khua ah Chin nu tleirawl te pakhat cu September 13, 2020 ah khan Kanpalet khua ah a um mi Kawl police pakhat nih hramhram in a tlaihhrem. Tlaihhrem a tongmi Chin nu hi kum(17) lawng a si rih i Police pa nih hin hramhram in a tlaihhrem ti asi. Chungkhar lei nih Police Sakhan ah report an tuah ko nain Phaisa le Police huham in Case cu thuhnawh le daihter an timh caah Chinmi tampi nih lungtlin lonak cathanh an chuah ve.

Chin nu tleirawl te a tlaihhrem tu Police nih Dantatnak pek hrim awk a si. Police cu mipi kilkamh le runven ding in rampi nih rian pek mi an si. A sin ain a rian ttuan lo in kum tlinglo nu ngakchia a sualpi caah Chin mipi kan lung a fak. Police lei nih thil tha lo cu thuhnawh in Phaisa le an sinak hmang in case daihter an tim caah Chin mipi lei nih kan cohlang kho lo. Sualnak a tuahtu Police cung ah dantatnak a um awk hrim a si tiah Kanpalet khua mi Chin zatlang bu pawl nih cathanh tiang an chuah ti asi.

Chin nu tleirawl sualpi kong ah Kanpalet peng, Chin zatlangbu phu(10) hna nih cathanh an chuah, cu hna cu Chin Women Development Organization (Kanpalet), Open Development Foundation, Chaichi Nay, Daw Nuh Sung khua thanchonak bu, Chin Youth Organization, Nu pawl hruainak phu, Chin Caholh le Nungphung thithruai nak phu pahnih le Kanpalet University Student Organization hna nih cathanh an chuah hi asi.

Kawlram phung ning ahcun Nu kum(18) a tling rih lomi cu kum tlinglo dirhmun ah chiah rih an si. Cu caah tutan Chin nu kum(17) a tlaihhrem tu Police pa zong nih kum tlinglo tlaihhrem case in taza cuai si hrim seh tiah Chin zatlangbu phu(10) hna nih cathanh tiang an chuah hi asi.

Note: Hmanthlak hi, hi thawngpang kan laknak nih an taarlangh chih lo ruangah, Google kan lak i, kan mah nih a remcanning in kan taar chinmi a si.