Thawngpang bultan| By Salai J Vanduhthar Lahnin| A poi taktak! Ralkaap nih Hakha CCPR i zung rianṭuanmi Salai Peter Thian Bawm Sang cu March 9 zinglei suimilam 3:00 Am tluk ah an tlaih tiah thawng kan theih. Thlacamnak in bawm cio hna usih.

Hi kongah a chungkhat Khuah Lian nih a taarmi cu,”Thlacam bawmh halnak: Ka naupa Salai Peter Thian Bawm Sang Peter cu March 9 zinglei suimilam3:00 Am ah ralkaap nih an tlaih. Amah hi Hakha CCPR i zung rianṭuan cuahmahmi a si i thlacamnak in kan bawm cio ve ram uh,”tiah bawmhhalnak a tuah.

Hakha Pyidawtha Sang khuabawi kum15 a tuan cang mi Pu Bawi Lian nih rian dinhnak ca a chiah. Hakha Pyidawtha Sang khuabawi kum 15 a tuan cang mi Pu Bawi Lian nih ngandamlonak lei he pehtlai in March 8 ah rian dinh halnak ca a chiah, tiah kan theih.

Ca a chiah mi ah, “Kum 60 ka tling deng ve cang. Cun, 2021 January 1 ah khan motorcycle khawndennak in sii-inn ka phan. Ka lu kaa khawn. Mah hnu in lungmih, lufah, mitkhuahmuh fianlo tibantuk in ka um i ka riantuannak ah harnak tete a um ca ah hi rian dinh halnak ca ka chiah mi hi ka cohlanpiak hram u,” tiah Peng Council Zung ah ca a chiah, tiah kan theih.

Pu Bawi Lian cu 2006 December 1 in 2021 March 7 tiang (kum15) Hakha Pyidawtha Sang khuabawi a tuan i kumkhua upa a si cang pin ah a ngandamlonak he pehtlai in March 8 ah rian dinh halnak ca a chiah hi a si, tiah kan theih. Source: The Hakha Times

Myanmar Caankarlak Vice President ah U Mann Win Khaing Tann Rian an Khinh. Ralkap nih uknak an lak caan chung ah Myanmar rampi vice-president rian ttuan ding in U Mann Win Khaing Tann cu Committee Representing Pyidawngsu Hluttaw (CRPH) nih rian a khinh chung.

U Mann Win Khaing Tann cu ralkap nih uknak a chuh hlan ah Amyotha Hluttaw Speaker rian a tlaimi a si. Source: The Chin Journal (March 9, Yangon)

Hmuhning|By Peng Hlawnceu| Kawl ralkap nihhin Chin ram hi thahrum hmang in hun kan deng sehlaw, Chin ram khuate zeimawzat cu ralzam in Tipi ral ah kan um a hau hnga. Cutin um khi vasi sehlaw ramdang le NGO,INGO hna bawmhnak hmuh huaha loin kan mah tein kan i zohkhenh kho lai maw timi katuak sek tawn. Cucu tutan ram buainak in a chuakmi CDM bawmhnak a chuakmi nihhin ruahnak tampi a hun ka chap. Chin ram ah kahdohnak hun chuak taktak sehlaw kanmah tein zeitin dah kan i zoh lai timi a foinak in ka langhter lai.

Pathian nih Chin miphun a kan dawt i kan pa le CNF hna hmang in Vawlei cung ram rum ramtha ah tampi a ka phakter. Cu chungah US ummi hi a tambik kan si. Tutan CDM bawmhnak zoh ko ahhin miphun kan dawtnak a lang khun. Hi pin ahhin mah le khua cio i zohkhenh le i kilven cio asi tikah hna a ngam khun. Cucahcun Kawl ralkap nihhin ral kan thawhhnawh sehlaw ralzam kan i cawmkho laimaw timi biahalnak hi fawideuh tukin a lam a awnh. Bianaah kan mah khua khi inndong 150 kansi hna i milu 800 leng kan si. Hi khuami nih tlakhat eiding khi Fangfak tun 250 hrawn asi.

Tulio phaisa le thilman in tuak ahcun Ks-40000×250=Ks-10000000 hrawng asi hnga. Chiti ciite mehhang ah Ks-3000000 le dangdang herhbau ah Ks-2000000 hei dih sehlaw a zapi in ting 150 hrawng khi thla fatin a dih hnga. Kan khua ramleng ummi zapi hi inndong 100 hrawng in kan tuak ahcun thlakhat ah Ks-150000 in kan kuat hna ahcun tha tein kan cawm khawhhna tinak asi.

Hi thhlakhat 150000 hi cu US $ incun $115 long asi ko caah hartuk loin thawh khawh kan si kolai. Hibantuk in a khua kip nih mah le khua cio kha kan i zuanhnawh cio ahcun kan unau Kachin, Karen pawl ralzam hna bantuk cun kan har lai ka zum lo.

Hitin tulio boruak he zohchih in Pathian hi Chin mi kan caah a tlai ballo i hlankan tein khua a kan khanpiak ko tihi a lang. Cucahcun tulio kan ram buainak he pehtlai in CDM nih teinak a hmuhlo sual i Kawl ralkap nih an kan hranhnawh hmanhah kan caah Pathian nih lam a rak kan serpiak diam cang tihi hmuhkhawh asi caah thinphan tukding kan silo.

______

Copyright ©  Chin World News Evening