Salai Thawngpi nih ca a ṭialmi cu khuaruahhar ngai a si ko. Hakha lei nawlngeitu, ṭuanvo ngeitu pawl cawlcangh ning a dik lo ngai timi a lang ngai ngai. Hakha lei minung vial nitin te Zinghmuh Tlang ah tam taktak in an ra peng, an kir ṭhan peng ko nain Ramthlo khua mi cu Falam peng nan si an kan ti ruang ah Hakha luh an kan sian lo ti a si.

Hi kong he pehtlai in Salai Thawngpi nih :Ka fiang kho ti lo, Ramthlo cu Falam peng nan si an kan ti le Hakha luh a kan siang lo, a kan kirter tiah ka nute nih a ka chimh. Cucu nan kir maw ka ti i kan kir ko a ka ti. Hakha in mawt’aw khat lulh an rak i cit i Zinghmuh tlang a kai mi liangluang khi Hakha an kir tikah an kham hna fawn lo. Ni khat ah tam tuk an rak ra peng. Saikal he, mawt’aw he. Anmah vial duh poh an chuak, an vak i kannih lei vial mi an i renghter” tiah a langhter hi a si.

Ramthlo khua mi vial Hakha ah luh sianh lo, Hakha khua in Ramthlo lei ah nitin te a bubu in rat peng ko cu ruah phu ngai a si.

Thawngpang dang rak rel chih:President Donald Trump nih American mipi minung pakhat ah Stimulus check $600 telawng pek nan timhmi hna hi a tlawm tuk ka lungtling lo, minung pakhat ah $2000 tal cu nan pek hna ding a si, nan pek duh hna lo ahcun $900 billion relief bill nan chuahpi mi hi VETO power ka hman khawh tiah tu zanlei ah a tlerh hna.

Congress nih zahan zan i an pass cangmi $900 billion bill cu atu tiang minsen a thu duh rih lo. President Trump nih Congress [ Senate+House ] nih nan chuahpi mi bill $900 billion hi remh than ulaw, minung pakhat $600 nan pek mi hna hi minung pakhat ah $2000 tal pe hna uh, nuva nih $ 4000 tal co ding in bill chuahpi ulaw min ka thut colh lai tiah a ti hna.

Bill nan chuahpi mi $900 billion chungah Coronavirus he a pehtlai lomi, a herh lomi, phaisa heu sawsawh mi nan telh chihmi hi nan remh dih a hau tiah a ti. “American ngunkhuai tax a pemi nih $600 lawng ngah i, phung loin a ummi, illegal family nih $ 1800 tiang co khawh ding cu a fair lo tukmi a si” tiah President Trump nih a ti. Cucaah Congress nih $900 billion an chuahpi cu zohfelnak ngeih than dawh an si caah minung pakhat nih $600 nak tam deuh hmuh khawh a si kho. Source: Salai Lairamthang