Breaking News: Tuzing Falam inn kanghnak ah a kal ve mi pakhat telh, minung pathum sin in COVID-19 zawtnak hmuh. 2021 January 12 zing suimilaam 3:00 le 4:00 karlak i Falam khuapi, khuachung lam aa tonnak hmun i inn kanghnak ah a kal i rian a tuan ve mi pa pakhat le minung pahnih dihlak fonh minung pathum sin in COVID-19 zawtnak hmuh a si tiah kan theih.

Hi kong he pehtlai in rian ngei pakhat nih, “Atu zawtnak hmuh thar mi hi an dihlak ah minung pathum an si. An pathum ning in Falam i Tonzaang pa zawtnak hmuh mi pa he Falam Golf (kouh-ti) kun honnak ah Glof an tu ti hna. Zawtnak hmuh mi he Glof an tuk ti hna ca ah amah he aa naihniam mi poh zawtnak kan chek hna i atu minung pathum sin in zawtnak kan hmuh hi a si. An pathum ning in Falam khuachung ah a ummi an si,” tiah a chim.

Chin Ramkulh chung COVID-19 zawtnak a chuah ka 2020 March 23 in nihin tiang ah zawtnak ngei minung 339 an si cang. Atu Falam i zawtnak hmuh mi pathum chung ah pakhat hi Falam Sipin Zung Lutlai pakhat aa tel. Zawtnak hmuh mi minung pathum hna chung ah pakhat hi tuzing inn kanghnak hmun ah a kal ve i rian zong tlawmpal a tuanpi ve hna. Cun, atu hi Sipin zung riantuan zong an dihlak in zawtnak an chek lio hna tiah kan theih.

Myanmar ram chung ah nihin tiang COVID-19 zawtnak ngei dihlak 131,186, zawtnak in a dam than mi minung 114,609 le zawtnak in a thi mi minung 2,858 an si cang tiah 2021 January 11 zaan suimilaam 8:00 ah Ramkomh Ngandamnak Zung nih a thanh. Source: The Hakha Post

2021 January 8:30 update news: Falam ah inn 6 a kaang, tarnu pahnih an thi, thilri sing 80 leng man a ciam. Falam khua, January 12 zinglei suimilaam 4:10 hrawng ah Falam Lamtonnak ah inn 6 a kaang i kumkhua upa tarnu pahnih a kanghchih hna, thilri sing 850,000 man hrawng a ciam, tiah kan theih.

“Ahote inn in dah inn kangh aa thok ti le minung zeizat set dah an thi ti hi kan hlat lio a si. Atu tiang ahcun kum 69 nu, Pastor zong a rak tuan bal mi le hnachet mi nu pakhat a kanghchih hna. Zeitin mei aa thok i a kangh ti hi kan hlat lio a si. Zinglei 4:10 hrawng ah a kaang i 5:30 hrawng ah mei kan thah khawh. Thilri a ciam mi hi kanmah nih kan tuak ning ahcun tangka sing 850,000 man hrawng a si,” tiah Falam Pengkomh (Khayaing) lutlai Pu Ca Zung Mang nih The Hakha Times ah a chim.

Hi kong ah Falam Peng Meithat Zung lutlai phone kan chawnh nain damlonak ruang ah sii-inn ah a um lio a si i kan pehtlai kho lo. “Chin Ramkulh Cozah lei nih kan tikhwahtawk in inn kaang mi in 6 siseh, mithit siseh, tangka Ks. 300,000 cio ka va bawmh hna,” tiah The Hakha Times ah a chim.

2021 kum January thla chung ah atu hi a voi hnihnak inn kangh a can hi a si. Hakha Khuathar zong ah 2021 January 9, zaan 11:00 hrawng ah inn 3 a kaang i Seven Star kedan dawr ngeitu U Than Wai zong a kanghchih tiah, tiah kan theih. Source: The Hakha Times

____

Copyright © Chin World News Evening