Admin||05 Biangreithlep|04|2020||Trump: Coronavirus in American Mipi 100,000 a Thi kho Men. US ah a thimi an karh Chin lemgmang hnu cun, American mipi a thimi hi minung 100,000 an phan kho te men ko, tiah Sunday in khan cun President Trump nih a van chim ruangmang ve cang. Kum dih hrawng tal in cun khamnak sii (vaccine) zong ser khawh a si te ko lai, tiin a chim. Suimilaam pahnih chung biachimnak a ngei i, US economy nunter than zau a herhnak kong le virus ai semnak ram a si mi China sual a phawtnak kong a chim.

Virus nih a tlunhmi American mipi hi 1.1 million an phan cang i, minung 67,000 lenglo an nunnak a liam cang. Cun, sianginn le business tampi zong phihkhar dih an si cang. Minung 75,000 n 100,000 tiang thi kho dirhmun kan si. Tuksum a si ko, tiah a chim. Kan hnung zarh belte ah khan cun minung 60,000 in 70,000 tiang hrawnglawng a thimi kan si te lai dah, tiin a rak chim bal.

US ram chung state vialte hna i a hnarcheu tluk hrawng cu an umnak hmunhma cio ah virus a karh sitsai ti lo dirhmun a hun phak in cun rian on than an i thok cio ve cang hna. Ram pakhat mi kan si bangin a ningpi in cun kan i phitkhar kho hrimhrim lo. Cu ti lo cun, ram chuahtak lawng pei a tan ko cang cu, tiin Trump nih a chim.

Nanmah FOX news pawl hi mi dirkamhtu nan si lo, tiin nai ah khan Trump nih a thangchiat len hna. Cuhlan i mipi ngandamnak lei tuanvo latu mifim pawl ralchanh in bia a chimmi kha tutan ah cun solhnalh a duh cang caah, khamnak sii hi kum dih hrawng tal ah cun chuah khawh a si te ko lai, ti phun in a chim ve cang. Kum dih hrawng tal ah cun khamnak sii kan ser khawh te ko lai dah. Cu ti ka chim tikah, doctor te nih cun chim lo ding bia ah an ka relpiak ko lai na in, ka lungchung in ka ruah ve mi te cu ka hun chim ko lai…ruahnak nakin tuan deuh ah khamnak sii kan hmuh te ko lai, tiah Trump nih a chim.

Dr. Fauci telhchih in, ngandamnak lei mifim tampi nih an rak chim cia mi cu, khamnak sii sernak dingah kum khat asiloah thla 18 cu a rau lai, ti a si. Cu ti ning a si taktak ko ah cun, coronavirus khamnak sii le a damhnak sii serchuahnak kongah ruahchannak a tlawm ngaingai tinak a si cu, tiah England’s Chief Medical Officer Chris Whitty nih April 22 ah khan a chim bal ve. Autumn hrawng tal in cun hngakchia pawl hi sianginn le college kai thok hna sehlaw ka duh ko, tiah Trump nih a chim. Zeibantuk thil a va si hmanh ah a hmih le a phalh kan i zuam ve ko lai, tiah Trump nih a chim.

Chiatchuah a tongtuk cangmi kan economic hun chanhchuahnak dingah Congress nih $3 trillion a chuah cang ko nain, $6 trillion tal cu hman kan hau te ko rua lai. Bomhnak tamdeuh in a ra cuahmah. A rat hrim awk zong a si, tiah Trump nih a chim. State pawl le ram chung cozah pawl caah $2 trillion hi hman ah a tha lai, tiah Democrats lei nih an duhnak an langhter mi cungah a cheukhat Republican pawl nih an thangchiat ngaingai hna. Inn le lo kan sak te ko lai, asinain, cozah lei nih ngunkhuai zuhnak (tax cut) kan hmuh ve tung lo ah cun zei hmanh kan tuah lai lo, tiin nihin bak ah Treasury Secretary Steven Mnuchin ka chimh cang, tiah Trump nih a chim.

Kum hramthok tein virus kongah a daithlan ruangah Trump cu heh tiah thangchiat a tong. Anih nih le China lawng sual a hun phawt chin ve.Virus kongah China nih a sining thatein a kan chimh lo caah, ai palh cikcek, tiin Trump nih a chim ve. COVID-19 hi China laboratory bakin ai thokmi a si, timi kongah tette fektein in a um ko, tiin Scretary of State Mike Pompeo nih a chim. Amah belte, hi hi cu minung siam chommi virus a si lo, tiah American intelligence nih an chimmi cu Pompeo nih a al lem ve lo. Ref: Reuters (Chelsea Bawi|Global Rawn Chin Media)