Atu lio vawleipi nih a ttihmi zawtnak ttihnung taktak a simi Wuhan Virus (Coronavirus) cu a karh chin lengmang ruangah tihphan a um taktak. Ahlei khun in China ram ah a ummi mipi lungrethei vansang au in an um hna. Kawlram mi minung 60 hrawng zong sianginn kaimi an um ve tiah theih a si i thlacamnak in bawm hna usih.

A min langhter duh lomi facebook pakhat nih a ttialmi cu ” Facebook ka hawi le pawl, atu lio China virus (zawtnak hrik) ka ngei ve i ka dam khawhnak hnga thlacamnak in ka bawm ve tiah kan nawl hna” tiah a facebook ah a tar. Kan hnulei zongah Chin nungak pakhat nih a dirhmun a that lonak kong a chim bal cang.

Kan unau mizo nih attialmi rak rel chih! Ngaihchia ngaingai a si. Ngaihchiatnak thawng a vun thang ve cang ai. Mizo kan unau nu nih a ttialmi cu “Wuhan Virus a ngeimi ah an ka lunghrinh ve an ka telh ve. 1. December thla dih lei 25 in khan ka nuam pah lo i siizung leiah i piah in ka caan hman hram ka thawk i zeibantuk zawtnak dah ka si timi Siibawi te a chim awk an thei lo.

2.Cuticun an New Year hmang dingin Beijing in Shanxi City ah cun i zoh ter pah in ka tlawng. 3. Cuticun Siibawi kan fuh/panh cawlh hna i Siibawi pa nih cun amah nakin a thiam deuhmi sinah a ka tthial (transfer) i cuticun an kan tthial lengmang i Siibawi 4 ka fuh/panh hna. Siibawite nih cun zeihmanh zong an chim lo sii ei ding an ka pek cucu a si ko.

4. Tuni ni 25 zing rawl kan ei lioah phone call a ra i China holh thiam in cun (Lily) a ti i ka min an ka auh ah cun hmaipanh bu tein (smiling face) ka zoh i ka pi cu nih cun siizung leiin a si i Beijing lei kan kir kho rih lai lo siibawi hna nih an i kham (block) a ka ti.

5. Zeidah sullam ka ti i ka pi nih cun ttha tthi zongin a ka zoh lo i na zawtnak fahnak hi (Wuhan Virus) na si ti an i lunghrinh tiah a ka ti. Zeipaoh si ko seh law thih le nun cu Pathian nawl a si i ka hawikom vialte hna thlacamnak in ka bawm hrawm uh tiah zaangfah kan nawl hna” tiah China ah a ummi Mizo nute nih cun a chim. A day ah attial rihmi cu Mizoram ah ka tlung ahcun ka chawnh hna lai ti le ka phang. Ka nunnak hi ka lak lo cun tuah khawhmi ka ngei lo Bawipa ka bawmhram ko tiah a ttial. Credit: Mizo World News