President hlun, Donald Trump nih US mipi ngunkhuai pekmi in Obama Federal cozah nih nau thah, nau hrawh a bawmhmi vialte cu a rak phih piak hna. US ramchung siseh, ramdang siseh kum 4 chung a phih cangmi cu President thar Biden nih tuchun ah President nawlngeihnak executive nawl hmang in a hrawh dih ṭhan.

Cucaah tax kan pekmi in democrats Biden cozah nih nau thah nau hrawhnak zongah an hman lai tinak a si. Vote a thlatu pawl an ichir ngai cang lai. Obama chan lio ah Federal cozah nih Planned Parenthood timi bu cu nau thah le nau hrawhnak caah mipi pekmi ngunkhuai hmang in an rak bawmh hna ti a si.

Thawngpang thar-President hlun, Donald Trump cu Florida a umnak Mar-a-Lago ah House Republican leader Kevin McCarthy nih a va ton i, 2022 house thimnak ah Republican party nih thutdan tam deuh an laak than khawhnak dingah riantuan ṭi ding in lungthinnak an ngei.

President Trump cu Republican party chungah amah tluk in party chungtel hna nih an uarmi le an zumhmi an um rih lo, a dirkamhtu supporter hna nih solid fekthumh in an dirkamh rih ko ti a si. President Donald Trump hi a hlan nak in atu ah mipi an uar chin lengmang ti a si.

President Donald Trump nih endorsement a tuahmi hna nih House ah siseh, Senate ah siseh teinak an co lai tiah Republican hruaitu cheukhat hna nih zumhnak an ngei. Cucaah atu bantuk House Republican hruaitu bik, Kevin McCarthy nih timh ciamman tein a va tonnak a si an ti.

President A Tuan Ti Lomi Tazacuai Cu Sullam Ngei Ti Maw? Nancy Pelosi hruaimi, House Democrats pawl nih President Donald Trump Impeachment an tuahmi cu nizan ah Senate ah tazacuai ding in House Managers pawl nih an chuahpi mi cu Republican Senator pawl nih President Trump cu President in a dinh cang caah US phunghram ah mah bantuk tazacuai khawhnak lam a um lo tiah Senator Tex Cruz le Marco Rubio hruainak in an dohkalh caah debate an tuah hnu ah tazacuainak pehzulh ding le pehzulh lo ding thimfung an thlak i, Republican senator minung 5 nih Judah Iskhariat rian an tuan caah vote 55-45 in an sung. Cucaah President Trump tazacuainak cu pehzulh dingah bia an khiah.

President Donald Trump a leirawltu Republican Senator minung 5 han cu, Lisa Murkowski of Alaska, Susan Collins of Maine, Mitt Romney of Utah, Ben Sasse of Nebraska and Patrick Toomey of Pennsylvania hna an si. Senator Rand Paul nih Democrats pawl nih an thil tuahmi cu sullam ngei lomi a si. Impeachment an tuhmi zong aum ti lomi a si. mit hleh tuah, hruh le molh rumro a si, Impeachment timi cu President a tuan lio mi hna lawng tuahmi a si” tiah a chim.

Senator Marco Rubio nih Fox News ah a chimmi cu “hruh bia le caan dih sawsawh a si, American mipi caah thathnemnak pakhat hmanh a um lomi a si, taza an cuaimi zong a um ti lomi a si” tiah a chim. Senator Lindsey Graham nih cun “ house I impeachment an tuah lio ah zeihmanh tet-te an chuahpi mi le tet-te tha tein an auhmi hna zong pakhat hmanh a um lo, hnawh thlorh in an i hnawh.

Mah bantuk democrats pawl thil tuah cu US democracy le President a tuanmi hna caah tihnung a si. Suimilam 50 chungah tet-te pakhat hmanh um lo, lawyer sihni zong President nih ihlan manh lo in impeachment tuah cu democracy ram ah a phung a si lo” tiah a chim ve.

Tuzarh chung ah hin, Senate nih President Trump tazacuainak summon ca an chuah lai I an pek hmasa lai. President Donald Trump cu zarh khat chung timhtuahnak an pek lai I, February 2 ah President nih tazacuainak summon an tuahmi cu a leh hna lai, mah nih thiamthiam ah tazacuaitu House managers hna nih pretrial brief an tuah ve lai. February 9 ah President Trump nih pretrial brief a pek ve lai. Mah cun tazacuainak cu thawk colh a si lai.

President Trump tazacuainak biachahnak a tuah dingmi cu Senator minung 100 an si. Senate ah Democrats le Republican minung 50-50 veve an um. Minung 67 nih a sual tiah vote thlak a hau. Republican minung 17 nih President leirawl in an kal taak a hau hnga. A si kho lai maw? a si kho lai lo. A tam bik ah minung 5 lawng nih an kal taak lai. Cucaah democrats pawl nih tazacuainak an tuahmi hi sullam a ngei lomi a si. An tuah khawh lo dingmi an tuah sawsawh le a si. Source: Salai Lairamthang
____
Copyright © Chin World News Evening