A Poi Ko. Kawlram Pa Cu Phone Games Aa Celhtuk Ruangah Malay In Kawlram Ah Kuat A Si: Malaysia ah rianttuan dingin a kalmi Kawlram mi pakhat cu phone in games a celh tamtuk ruangah lungthin lei mitlamtling lo bantukin a um caah Kawlram ah tlunter a si tiah” Lovely Heart Philanthropic Youth Blood Donor Organization Malaysia-Myanmar sin in theih a si.

Kualalampur khuapi chungah rianttuan mi Moe Thein Kyaw cu rianttuan aa dinh caan le zaan zan paoh ahcun zeidang cu chim lo zan hngilh caan hmanh thei kho ti loin phone games a celh tamtuk ruangah mihrut-lungthin lei mi tlamtling ah a chuah cang tiah chim chih a si.

Sizung “Clinic” ah thlopbulnak an ngaih peng ko nain tthat lei a penh khawh ti lo ruangah Lovely Heart Philanthropic chungtel simi Ko Thein Maung bawmhnak le nawlpiaknak in Kawlram a chungkhar hna sinah tlunter dingin timhlamh colh a si.

Mah hnu ah midam lo Moe Thein Kyaw cu a nu le pa sinah a ran khawh chungin kuat le tlunter dingah an tawlrel i, amah lawng in Kawlram ah tlunter loin Lovely Heart Philanthropic hna nih mitlung kal an hawlpiak hnu ah tlunter a si,”tiah Lovely Heart Philanthropic nih thawngthanhnak an tuah. Hi kong he pehtlaiin Moe Thein Kyaw cu October 26 ah khan Kawlram ah kuat a sinak le a phanh cang nak kong zong Lovely Heart Philanthropic Youth Blood Donor Organization “Malaysia- Myanmar” nih an langhter.

Siaherh Bia: A cunglei kong he pehtlaiin atu ahcun hngakchia bikin upa bik tiang nih Phone tongh le ngeih cio a si cang tikah kanmah Laimi lah zongah games a hruhpi mi kan tam cawng, Mah ruangah kan fale zong nu le pa nih an ralchung in an luat khawhnak ding le games nih an thinlung a lak hna hlanah zohkhenh le kilven zia kan thiam taktak a herh cang. Games ruangah a nunnak tiang liammi zong an um i, harsatnak a tongmi an tam cang. Mah ruangah kan i ralrin taktak a herh cang.