Kalaymyo Quarantine chiahmi lakah aa tel vemi Nu pakhat nih Covid-19 Kalay volunteer le rawl an pek mi hna kong cu dawhcah lo taktak in ca a ṭial i Kalay thawngpang ṭialnak facebook group ah a tarlangh ruangah Chin mi fak ngai in minchiatnak kan tong.

“Kalay Quarantine ah a ummi pawl cu Volunteer pawl nih rawl a uihmi an kan pek peng. Voikhat voihnih lawng zong a si lo. Zingzaan, nitin in rawl uih lengmang an kan pek. A lakin kan eimi zong a si lo. Phaisa pek in kan eimi, ei man kan liam mi a si nain an rawl pekmi cu ei awk tlak lo a si. Uico le Rang bantuk men ah maw an kan rel” tiah thangchiat cabia dawh lo taktak cu a ṭial in a tlangzarh hi a si.

Hi nu nih cabia dawh lo taktak le thangchiatnak ca a tlangzarhmi cu Kalay Covid-19 Volunteer pawl nih an hmuh ve tikah an ngaih a chiat ngai ngai lawng si loin Chin mi kan mual an kan phoh a si ko tiah an lung a fak ngaingai.

Cu hi nu caṭialmi kong he pehtlai in Kalay Volunteer pawl nih lehnak le hrilhfiah nak zong a tang lei bantuk hin an tuah ṭhan ve.

Kalay Volunteer nih lehnak an tuahmi,“Covid-19 pulrai a karh lo nak ding ah tiah ramleng in a rak tlungmi pawl Quarantine ah luh ter peng an sinak, Quarantine Centre chiah a si nak hi thla 6 lei ah kan panh cuahmah ve cang. Quarantine ah chiahmi minung 1700 leng cu zingzaan in a
ak tein rawl pek le zohkhenh peng an rak si. A hmasa ahcun Quarantine a luhmi caah tiah siaherh nak he rawl a rak hlu tu an um peng. Cu caah a changchang tein hlutnak caan tiang in kan rak suaisam piak hna.

“Quarantine ah a lutmi pawl voikhat rawl dangh hna nak ding ah hin a ting leng in phaisa an dih ve. Nicaan a hun rau, thla 6 zong kan hun phan deng ve cang. Cu tikah Rawl a hlu tu zong an tlawm cuahmah ve. A hlu tu cu an um pah ko nain a hmasa bantuk in an hun si ti lo. Minung 3000 leng, quarantine ah a ummi chung in minung 7 nih an i lawmhnak an langhter i quarantine an um chung ah zohkhenhnak, rawl le eidin cung ah an i lungsinak langhter in, quarantine in an chuah hnu ah rawl hlutnak zong an rak tuah nolh ve ṭhan.

Atu ni tiang zong ah Quarantine ah a lut tharmi um peng a si, asinain rawl hlutu an tlawm cang ruang ah Covid-19 Volunteer pawl nih Quarantine i a lutmi eidin kong ah si khawh chung in khuakhan nak hun ngeih zong a si.

A leng ah rawl voikhat ei man hi MMK 1500 cu a tlawmbik a si. A sinain “Rawl dawr nih khuatlang le mipi bawmh ai ah tiah rawl puai khat ah MMK 1000 in an kan ṭhumh piak. Cu hmanh ahcun an Dawr in Quarantine Centre tiang rawl phak pinak ding ah anmah nih Motor tiang in an kan tawlrel piak lawng si loin, Quarantine a lutmi pawl an rawl ei ka a thaw sual lai lo tiah Cettani le meh tuktak zong a hleihluat in an kan timh piak chih tawn. Kalay i CBFQ dirhmun in cun Quarantine a lutmi pawl hrang ah a si khawh chung in rawl hi kan damh, kan tawlrel peng ko .

Kan si khawh chung in kan cawlcang i kan tawlrel ko bu ah nu pakhat nih thangchiat nak ca a hlah i “Rawl uihmi an kan pek. Voikhat voihnih men a si lo. Nitin zaantin in rawl ttha lo, a uihmi an kan pek peng. Uico le Rang bantuk men ah maw an kan rel. Rawl ei man zong tha tein kan liammi a si an thei lo maw” tiah thangchiatnak an kan tuah hi cu kan ngaih a chia ngaingai” tiah lehnak an tuah ve.

Cun Kalay Volunteer rianṭuantu pakhat nih fianhnak a tuah chihmi cu “A hmun ah a um vemi, neihniam tein a zohkhenh mi hna ka si. Cu caah hi nu caṭial hi a dik lo, thangchiat duhnak menmen a si. Cu ruang ah hi kong he pehtlai in Quarantine ah a lutmi an za tein le ca post tu nu zong kan auh hna i hmunkhat ah biahal nak le biaruah nak zong kan tuah colh” tiah a chim chap.

“Rawl dawr ngeitu nih bia halnak a tuah hna i rawl kan i pekmi hna hi a uih maw tiah a hal hna tikah kan thei lo tiah an chim fawn. Cun Volunteer rianṭuantu le Quarantine a ummi dihlak zong ṭha tein biaruahnak zong kan ngei.

Asinain hi bantuk ca post mi ruang ah “Rawl dawr ngeitu cu a tap chih ve. A tu tiang a lung a ṭha lo. Zaangfah nak thinlung he kan cawlcang, midang caah ṭhahmenmi si kan i zuam ve kan ti lio ah hi bantuk in thangchiat nak ca post cu tiah an lung a ngaingai” tiah a chim fawn.

Covid-19 pulrai a karh lo nak ding ah tiah Kalay hrambunh Chin mi Volunteer bu pawl zong biatak tein an cawlcang, eidin tirawl an damh piak hna lio ah nu pakhat nih thangchiatnak ca a postmi ruang ah an lung a fak i Chin mi thangchiatnak, min chiat nak tuar hrimhrim hna seh timi a si ko ti tiang in a ruatmi an um.