Gas Dur Fir Ruangah Chin Ram in A rami Lal Lian Mawia Kum 25 cu Mizoram Palik nih an tlaih. India ram chung Mizoram state Mamit pengah Chinram Falam pengin a rak rami pa Lal Lian Mawia kum 25 cu Gas dur rawlchumh nak fir ruangah Mizoram palik hna nih an tlaih tiah thawngtheih a si. Credit: Chin Cable Network Channel

Thawngpang dang: Sagaing Ramṭhen In Nihnih Chung Ah Minung 7 Cu Aho Hngalh Lo Nih An Thah Hna!: Sagaing ramṭhen chung in nizaan July 28 le nihin July 29 chung ah thahnawnnak voi 5 a chuak i, minung 7 an thi tiah tualchung mi nih an chim. Nihin July 29 chun suimilam 12:00 hrawng ah Monywa peng, Khawaikyin khua ah U Khin Maung Myint le a nupi Daw Aye Htay cu thah an tong tiah tualchung mibawmchantu phu chungtel pakhat nih a chim.

Sagaing ramṭhen Shwebo pengkomh Khin-U peng Yuasin khuami U Sein Htay (kum 62) le U Myo Hlaing Win zong nizaan July 28 zinglei ah thah an tong. Cu ni zaanlei ṭhiam suimilam 6:00 hrawng ah Myinmu peng Kayu khuabawi hlun U Myint Zaw zong aho hngalh lo nih an thah tiah theih a si.

Nizaan July 28 chun suimilam 11:00 hrawng zong ah Sagaing peng Linyin khua U Win Aung (kum 52) cu meithal kahnak in a nunnak a liam. Chunhnu suimilam 1:00 hrawng ah Sagaing peng Ngawngpinwon khuami motor khaltu U Zaw Naing Win zong kahthah a tong, tiah theih a si.

Nizaan July 28 chunhnu suimilam 2:00 hrawng ah Yinamabin pengkomh Pale peng Tattaya khua sianglairun ah cachimtu saya U Sai Min Lat cu nam sawh a ton caah faak ngai in hliam a tuar tiah theih si. Khua mi thah an tonnak kong he pehtlai in, nunnak liammi hna umnak khua pawng palik hna nih chekhlatnak an tuah nain cu thil a tuahtu hna cu aho an si an hngal kho rih lo.

Journalist Maung Maung Myo Cu SAC Nih An Tlaihnak Thla 2 Hnu Ah Kum 6 Thong Tla Ding In Bia An Ceih!: Journalist Maung Maung Myo cu SAC nih an tlaihnak thla 2 a rauh hnu in, nihin July 29 ah Hpa-An biaceihzung nih kum 6 chung thong tla ding in bia an ceih, tiah theih a si.

Journalist Maung Maung Myo cu phungrelnak 52(A) in bia an ceih i, saanghlei baiceih zung ah an kai lai tiah Mekaung media rianṭuantu Ko Ngian Lin Htet nih a chim. Journalist Maung Maung Myo cu Mekhaung media ah thawngpaang a thanh tawn hna caah biaceih thong an thlak, tiah theih a si.

Journalist Maung Maung Myo hi 2022 May 10 ah Myawady in Mandalay lei a kir lio Thanwin hlei i check ton lio ah a phone chung i ummi thawngpang pawl ruang ah an rak tlaih tiah theih a si. February 1/ 2021 in kum khat leng chung ah Journalist tlaih a tong mi 100 leng an um cang i, cuchungah thlah ṭhan mi zong an um i, thong chung ah an hren mi zong an um rih, tlaih chap mi le thong tla ding in bia an ceih mi zong an um tiah theih a si. Tazacuai an ton ruangah a zaam mi zong an um i, kahdohnak hmun ah nunnak a liam mi 3 an um tiah theih a si.