Asho Chin ralzaam minung 300 hrawng eidin awk ngei loin an Um. Rakhine Ramkulh Ann khua ah ralzaam in aa dor mi Asho Chin minung 300 hrawng hna cu ti le rawl le sii-ai an ngei ti lo i lungrethei ngai in an um.

Himnak a um lo ca ah kir ti lo ding in timhtuahnak a ngei mi an si i a rannak in hmun- hma thar pek in khua serpiak an duh. Rakhine Ramkulh cozah nih ti le rawl a bawmh ko hna nain khua thar serpiak hna ding cu a tuan tuk rih tiah, tiah VOA nih a langhter.

Cozah ralkap le AA kahdohnak ruang ah Dalatt, Metlamaung le Kayukain khua i a um mi Asho Chin hna cu Magwe Ramthen lei le Ann ah minung 500 hrawng an zaam i minung 300 hna cu Cozah nih Peng Lentecelhnak inn ah an chiah hna. A dang 200 hna cu kiangkap chungkhat hna sin ah an um. Atu an dirhmun he pehtlai in Dalatt khuahlun in a rak zaam mi U Hla Min Tun nih hitihin a chim.

“ Kan harnak cu a phunphun a si ko. A biapi bik mi cu ei le din tirawl le sii-ai hna hi an si. Ngandamnak kong ah cun hi ka i Pyithu Sii-inn ah a rem ning in kan i thlop. A bu in kan um tik ah ngakchia hna ca ah cun a tha lo ngai, an chung nih a thlet hna i kan khua cio ah kir than ding cu kan i tim lo. A si khawh ahcun Ann chung i ralkap umnak he aa naih deuhnak ah hmun kan pe hna sehlaw kan duh. Zeicatiah , kan khua cio ah kir ahcun pawcawmnak ca ah a tlamtling ti lo. Kan zuat mi satil hna zong min- ung kan um ti lo ca ah atu ahcun pakhat hmanh an um ti lai lo. A biapi bik mi cu kan nun him- nak hmun i um hi a si ko tiah an ti.

Asho Chin ralzaam hna chung ah hin sianginn a kai lio mi ngakchia 100 hrawng an um i cu hna cu sianginn panga ah an cawn mi cataang cu peh than ding in sianginn ah an luhter hna. “Ti le rawl cu khuachung i zawnruattu cheukhat hna nih an hlut mi facang lawng a um cucu an ei mi a si. Zawnruattu hna nih an hlut mi facang hi ni 5 ca lawng a taang, ninga ca a dih cun ei ding a um ti lai lo. Pengukbawi nih nan facang a dih in ka sin ah rak la uh, a kan ti,” tiah Ralzaam Zohkhenhtu Committee chungtel U Than Cho nih a chim.

Dam loin sii-inn ah kan i piah tik ah sii inn nih an ngeih mi sii cu a lak in an kan pek nain sii-inn nih an ngeih lo mi sii cu a leng ah cawk a si, bawmtu le an um fawn lo tik ah kan har taktak,” tiah a chim.

Cu lawng si loin khuasik caan a si tik ah puanlum le hruk-aih ding tha deuh zong an herh tuk, tiah U Than Cho nih a chim. Credit: laikokekjournal (VOA)

Tualchung thawngpang rel nan duh ahcun Laikokekjournal hi rak leng ve. A website Laimi/tualchung thawngpang phun kip rel khawh a si.