Ralkap Thapetu Mipi Zong Kutdong Panga He Nihin Zaanlei Lam An Chuak Ve. Nihin Yangon khua ralkap cozah dohnak caah mipi aukhuannak le lamzawhnak an tuah. Zaanlei sang suimilam 4:00 pm hrawng ah khan Tatmadaw ralkap duhtu hna cu zalam ah mawtaw 40 hrawng he a phuphu in an i chawk i lam an zawh ve.

CBN nih US Embassy zung hmai Facebook live kan thlah lai te ahkhan Tatmadaw dohtu phu hna an umnak ah hi mibu cu an rak phan i, ralchan in an i aukhak. Asinain buainak cu a chuak hraw lo. Ralkap dohtu phu hna nih ralkap uknak thlaknak le democracy thlenremhnak ramkhel minung an tlaih mi thlahnak an hal pah in an kutdong pathum kha van ah an hler. Ralkap a duh tu hna nih cun “STOP” ti mi kutdong panga hmanthlak he lam an rak i chawh hmuh khawh a si. Ref: CBN

Relchih: Kawlram Khrihfa bu komh le Bible sianginn kip cio nih statement an chuahmi hna pawl zohtik ah minthut lo an tam. Minthut buin chuahmi cu an tlawmte. A herh tuk cu a si lem lai lo nan. Aruang cu a um ko lai ka zumh. President siloah GS siloah principal ti bantuk nih minthut awk a si nan ka ti. An ngamh lo bia hna a si hnga maw ka ti.

Kum 2007 lio ah Kawl Buddhist Phungki pawl hruainak in sandah rak piah a si. A rak buai tuk ve. Khrihfa lawnglawng kan rak i tel lo. M.I.T ka kai lio si kaw Dr. Zau Lat nih a kan timi cu atu lio buainak ah hin Khrihfa pawl nih zeidah kan tuah ve awk a si timi a kan chimter. Kan ruahnak chim cio ding a kan ti. Keinih ka timi cu MCC tal nih ca an tial i uktu cozah sinah an kuat awk si ka rak ti bel. A ka timi cu mah cu kan ruatmi kan ceihmi a si ko nan minthu ngam an um lo i kan ttial tthan lo a ti.

Ka palh lo ahcun mahti cun a chim ko rua tiah ka ruah. Atutan statement pawl tamdeuh zong minthut lo a tam ngai. A herh lo an ti bia maw si hnga siloah an thut ngam lo biadah a si deuh hnga ti hna ka ruat. Tlaihkhih taktak hna khi van chuak sehlaw minthu tu lawng tlaihding cu a relrem lai lo an tibia hna si hnga maw ka ti pah fawn. Letterhead paper in ttialmi cu minthut a tel awk bak si nan. Kan bu chuahmi zongah minthut a tel ve lo. Credit: Van Tum