Amerika hrilawknak thu ka ngan khat deuh ih culai lakah thu a phunphun a ra suak. Trump boruak a ṭha taktak tivek, Trump in a neh tivek Trump a sung tivek Trump in Ralkap thuneihnak a phuang ding tivek ngan celcel a si. Asinan pakhat hman a dik lo. Trump ih National Security Adviser hlun Michael Flynn cun ṭuanvoneitupawlin an hna an tlin lo ahcun ralkap kaihruainak thawn hrilawknak thar tuah ding a si cu a ti nan Trump lam ihsin zianghman rel a um hrih lo.

Tu karlakih thil cang mipawl hi Trump hrang thathonak tete le riahsiatnak ding tete an um hai. Asinan thil tumpi cang mi a um lo. Tuizan ah US Supreme Court in Pennsylvenia thubuai an cohlan le cohlan lo thutluknak an tuah ding. Himi hin thil a danglam thei. An cohlanah cun Trump hrang beiseinak a nung lai dingih an cohlan lo ahcun beisei ding a mal sin thlang ding.

A dang leh cu State Hluttaw pawlin State hrang Electoral Voter an ruat tikah “Faithless vote” an ti ih mipi hriltlin si lo mi vote petu an ruat le cu boruak a hnawk vivo lai thei. A san cu Pennsylvenia, Michigan, Arizona le Georgia hi Republican control mi Hluttaw a si ruangah a si. Trump Team hin thubuai an tuah mi hi 50 leng lo a si ih cupawl lakah 39 hrawng cu Judge in an hnawlsak zo. Ziangahtile Legal Ground (dan ṭansan) a hnget lo ti a si. A hrimhrimah hrilawknak ih el-awknak ah Court hi a hrawlhaw duh lem lo.

A buaithlaknak cu hrilawknak hi bawhlung puai vek a si. Ṭuanvo neitupawlin dan an tuah mi an hmang. Asinan cuih bawhlung puai ṭuanvoneitupawl le refree in ṭan lam an neih pang cun puai cu zoh a nuam lo, a dik lo. Cuticingin a tuartu lam cun ti theih a nei lo, an tuar cuahco men a ṭul. Court ah feh khal sehla an sung thotho ding. 1986 kum World Cup, England le Argentina puai ṭumah England lamah Maradona in a kut thawn a sawh lut. Kut thawn sawh lut cu kawl a si thei lo. Asinan a dik lo ti an theih hnu khalah lawnsal a um nawn lo. Argentina cu Champions ti a si thotho.

2006 Champions League final ih Barcelona vs Arsenal tla kha a cing lai kan um ding. Refree ih an hril mi pa kha Barcelona ṭantu a rak si ih puai thawk hlan ni ah Barcelona kawr thawn a zukawk ruangah Arsenal lamin an duh lo. Curuangah Terje Hauge timi Norway mi ṭuanvo an pe. Anih khal Barcelona fan thotho a rak si. Arsenal in kawl khatih hmai an hun hruai cu le…minute 20 lawng an lek laiah Arsenal kawlkil Lee Man cu ‘rin lengah bawhlung na kai’ tiin dik lo takin Red Card a pe. Bawhlung puai zohtu 79610 hleiah TV ih zohtu million tampi khalin rin sung ti hmuh a si. Puai cem hlanah TV ah piahsal leuh leuh a si. Cun Barcelona lamih kawl khatnak Samuel Eto’o ih kawl khal Off-side ti a si. Asinan Refree in kawl a pe thotho. Arsenal lam hin Board thuneitupawl hnenah maw, Court ah maw feh khal sehla Refree thuthu an rak tisak men ding.

Amerika hrilawknak khal hivek cekci a si. A dik lo ti cu kan thei. Hi State 6 ah hin diklonak le vote ruknak nasa tak a um ti hi cu el rual a si lo. Asinan Court in an hnawlsak thotho. Myanmar khalah hivek el-awknak cu court ih ken lo ding ti a si ruangah UEC thiltidan a dik lo tiin party hrekkhatin an ti rero nan court ah fehpi theih a si lo. UEC hi dan le tidan tuah mipawl thawn pehparin Court ah rel theih a si lo thu mizan ih UEC thusuah khalah ngansal a si.

A buaithlaknak dang leh cu RINO ruangah a si. RINo ti cu Republican In Name Only ti a si. Republican-pawl lakah hin Media le mipi(mob) ṭih ruangih thudik ih ding ngam lo, an thurin parih ding ngam lo, phatsan mai hi an um ringring. Tu khalah Georgia ih vote cek an dil cu Secretary of State Brad Raffensperger in a siang eu eu lo. Governor Brian Kemp khalin a dil nan Georgia Election Board Chairman cu Secretary a si tikah amah lawngin thu a pe thei. Hite pahnih hi Trump ih bawmnak ruangih tling an rak si nan loziang! Cuvek thothoin Arizona Govenor Ducey khal a si thotho.

Cun Pennsylvenia khal hrilawk zikte ah Secretary of State Kathy(D) in Dan ih a sian lo mi amai thu in a thleng thluh. Hi thu hi Republican lamin hrilawk hlanah Court ah an thlen nan State Supreme Court cu Dem lam ruat deuh lawng lawng an si ruangah an sung. US Supreme Court ah an thlen nan John Roberts in a phatsan ruangah 4-4 in an cohlang thei lo. Cuhleiah Dan cun hrilawk ni 7:00pm tiang lawng vote cohlan a siang nan Hluttaw in ni 3 tiang a dirhbet. Hitawkah RINO hrekkhat Dem lamih an vote ruangah a si. Himi ruangah hrilawknak an sun phah a si.

Trump lam hrang thazang ngahza mal lai um cu Georgia ah County 22 ah Dominion Software cek dingin le Michigan, Antrim County ah Dominion cek dingin Judge in thu a pe. Trump Team in Michigan Supreme Court ah hrilawknak ih diklonak thu an thlen lala.

Amerika ah hin Republican le Democrat lam khalah Establishment an ti ih, kum reipi US Politics control-tu mi 100 kiangkap hrawng an um. Hi-pawl hi Corruption lamah nasa takih an tel ruangah midang sualnak khal an thup. A san cu anmah khal sualnak an neih ruangah a si. Hivek corruption phawrhsuah tumtu cu khawi party khal do cece an si. Trump khal hivek a si ruangah Republican rak kaihruaitu Bush tei sung, McCain tei sung, Mitt Rommney, Chief Justice John Roberts, John Casick, Jeff Flake le Licoln Project hotupawl le khipawlih milaipawl cun an dodal.

Ṭuan ding hna tamtuk lakah Trump Legal Team hotu Rudy Giuliani cu Covid 19 a rak ngah ngelcel. amah hi kum 76 a si zo. Asinan a ṭha zet ti a si. Trump ih thubuai tuizan ah Supreme Court in an cohlan pang ahcun Texas Senator Ted Cruz in Court ah ka dinpi ding a ti. Anih hi 2000 kum Bush hrang rak ding zotu a si. Trump hrangah beisei ding a tam lo. Asinan lamzin a pit hrih lo. State Hluttaw pawl le Supreme Court cangvaihnak thlir phawt a ṭul a si hi! Credit: L. L. Z