By Zasang Cinzah: Nizan ah Saya Tluang nih ca a rak ttialmi ka rel i Khua tampi a ka ruahter. CDM ah itel a duhmi tampi cu nifatin an pawcawmnak ruah ah an itel ngam lo. A cheu cu an rian sungh thai an ttih ruang ah an itel ngam lo. Miphun le ram dawtnak a ngei lomi caahcun a fawi bak lomi a si.

Asinain Ram le miphun a daw taktakmi hna cu, an pawcawmnak an ruat lo. An rian sungh lai zong an ruat lo. An nunnak bak an thap ngam ko. Nihin tiang ah nunnak a chapmi minung 50 hlei an si cang. Ramchung ah a ummi hawi le hna Israel mi hna Egypt ram sal in an luat khawhnak ding caah, Egypt ah an ngeimi thilri le sinak vialte kaltak in ttih a nung takmi rili sen tan an rak ithim bantuk in Kawl Ralkap sal in kan luat khawhnak ding ca ahcun sinak kaltak in CDM ah zumhnak he rethei ithim caan a si.

CDM nih aa timhmi cu zungzal in Ralkap tei kha a si. CDM ah kan ipaih viar ahcun fawite in Ralkap cu kan tei ko lai. Ralkap kan tei ahcun, zungzal freedom kan hmuh lai pinah tulio Kan rian nakin a ttha deuhmi rian tampi ttuan awk kan ngei te lai. “CRPH hi kan zum hna lo. 2008 phunghrampi remh an duh lo. Dr Sasa cu UN kalning aa fiang rua lo” tbk in thiamco icuh caan a si lo.

Israel warrior nih an tei khawh lomi Goliat cu raltuk experience a ngei lomi David nih a tei bantuk in Dr Sasa hi Pathian nih a hman ahcun experience ngei tampi nakin rian a tuan kho deuh te lai. Cucaah thlacam in bawm ko hna usih! Min Aung Hliang nih Aana a ting nak a ruang cu 2008 phunghrampi remh khawh ding a si cang caah cucu a ttih i, hruh-hrulh-hram-hram in aana a lakmi a si. Cucaah CRPH kan ngeih hi Ralkap teinak caah a thabik mechanism a si i, kan tei khawh ahcun 2008 phunghrampi cu a mui hmuh awk hmanh a um te lai lo. Cucaah lunghrinh awk a si lo.

Relchih: Min Aung Hlaing hruaimi ralkap nih a hramhram in uknak an lak tikah kan ram cu nikhat hnu nikhat in buainak nih a zulh lawng si loin nihinni tiang ah sualnak ngei lo nunnak a liam mi an tlawm ti lo. Ralkap cawlcangh ning zoh lengmang tikah ramchung mipi lawng lawng si loin vawlei pi tiang an lung a si ti lo. Ralkap cawlcanghnak kong he pehtlaiin ramchung hriamtlai simi “KNU” nih nihin an lungput fianghrlang tein an anghter cang. Nihin ah KNU nih vawlei pi theih in an phuan mi cu “Ramdang he i bawm in Ralkap pawl cu kan hloh dih hna lai tiah ralttha taktak an phuan cang.

Nihin KNU cawlcanghnak: Meithal i tlaih bu in ralkap sunghnak a au ngammi cu KNU lawng an si rih. Nihin Karen pengkulh chung mipi lam cung chuahnak ah Karen Ralkap KNU nih mipi biatak in an kilven hna. Mipi pawl dinti le A-E pawl zong heh tiah an phawtzamh hna. Cu lawng hlah Loudspeaker i put in ralkap sunghnak an au rih. Atu tiang ah mipi sin ah meithal he sandah a piahmi le a aumi hi anmah lawng an si rih. Upat lo awk an tha lo. Tlangcung mi lak ah anmah KNU hi rumra a ngei bik an si. Hlan chan hmanh ah Kawl ralkap a rak tei pah lengmang mi an si. An thi hrim a sang tuk.