KAN UM NAK HMUN LE INN: Kum 1990 hrawng in kum 2000 hnu in biatak tein chin miphun hna nih kan thut dirnak hmunhma khua le ram cu kan hun i thleng hna! Hmailei khuasak tintuknak, pawcawmnak le thanchonak tiin khuate in khuapi, ramchungin ramleng, tiin hmunkip ka kip ah thih-nun ngamh in um kal cio a si. Kan va phaknak khua le ramah umnak inn kan i hlan i a si kho nih kan i cawk cio hna.

KAN UMNAK HMUN LE INN A THIANG MAW?: Kan Bible ah inn thianglo kong kan hmuh. Thianh khawhmi a um i thianh khawh lomi zong a um ti kan hmuh. Levtikas 14.33-53 kan rel ahcun inn thianglo ( inn thinghmui ) a um i thianh-khawh a si mi le thianh-khawh a si lomi kan hmuh. Bible bantuk in nihin kan inn hna ahcun thinghmui cu a um ti lai lo nain a thur hnawmmi inn a thianglomi inn an um ko i cu bantuk hmun le inn i a ummi hna cungah chiatnak lei thil a tlung tawn ti hi hngalh a si.

Na umnak inn cu na hlanmi inn a si ah, na cawkmi inn a si ah, a tuanbia chia a um maw? Na rak um hlanah zeibantuk minung nih dah an rak umnak le zeidah an tuah? tibantuk tete hna kha ralring tein hlat khawh ahcun a tha ngai. Hmun le inn hna ahhin a ruang tampi ruangah thlarau thalo, khuachia hna nih hmunhma an rak lak khawh tawn ve. KHRIH JESUH zumtu si ko bu ah, na umnak hmun le inn kha thlarau thalo, khuachia hna nih hmunhma an laak khawhnak a rak si ahcun, thlua na chuak lai lo i sunghzatlaknak pakhatkhat na tong ko lai.

HMUN LE INN THIANGLO LE A THIANH NING: Hmun le inn thianglo titikah thlarau thalo, thlarau sual, khuachia hna nih hmunhma an laak khawhnak an umnak hmun le inn ti duhnak a si i phunhnih in kan then lai.

(1). Minung nih sual an tuah bal lo nak hmun le inn,” thianh ning: Cubantuk hmun le inn ah thlarau thalo, thlarau sual, khuachia nih an rak umnak hmun a si ahcun, cubantuk cu JESUH KHRIH aa bochanmi nihcun ol tein khuachia hna cu nawlpeek in thialter khawh an si. Khuachia thawl hnuah JESUH thisen canah, Olive chiti kha inn hmun le inn khan tete kha theh i inn kaba hna ah chiti thuh ding a si. thlarau thalo, thlarau sual, khuachia an um ti lo ti hngalhfian hnu lawngah hnangam tein um ding a si.

(2).Minung nih sual an tuah balnak hmun le inn,” thianh ning: Mi i thahnak, nau thahnak, chiatserhnak, biachia phunphun chimnak, nupa sualnak, khuachia biaknak, rithainak zuarnak tibantukin, hmun ah siseh, inn ah siseh minung nih PATHIAN huatmi sual tuah a si tawn. Cubantuk PATHIAN huatmi sual tuahnak hmun le inn hna ahcun thlarau thalo, thlarau sual, khuachia hi an um tawn. Pakhatnak bantuk khin JESUH KHRIH ka zum ko tiin thawl khawh a si lo. Hmun le inn i sual an tuahmi hna kha sualphuanpiak in thianter hmasat.Cu hnucun thlarau thalo, thlarau sual, khuachia hna cu thawl khawh an si. Pakhatnak bantukin Olive chiti hman ding. A thiang ko ti hngalhfian hnu lawngah hnangam in um ding si.

THIANH KHAWH LO MI HMUN LE INN: 1. BAWIPA PATHIAN hna tlak tein sifak pakhat nih hmun le inn a ngeih hnga, Sihmanhselaw Cozah nih maw, mirum mithawng nih maw hranhramin an va chuh hnga. Cun cu bantuk hmun le inn cu zeitikhmanhah thianhpiak khawh a si lo. Hmasa i hmun le inn ngeitu thinlung va nawlpat khawh ahcun a tha ko. A thinlung a dam lo paoh ahcun thianh khawh a si lo. Hmasa i hmun le inn ngeitu a thih cang le bang ahcun zeitikhmanhah thianhkhawh a si lo. Cubantuk hmun le inn i va um cu mah le mah chiat i serh he aa khat ko. 1 Siangpahrang 21.1-19 ah Israel Siangpahrang Ahab nih Naboth dum a chuhnak le chiatserhnak tu BAWIPA PATHIAN sinin a hmuhnak kong a um.

Sihmanhselaw, BAWIPA PATHIAN nih hna tlakpi mi si loin, mi pakhat-khat nih tangka duh ruangah hmun le inn aa humhaak hnga. Nawlngeitu hna nih thil dangdang caah an chuh i midang an peek tik hna zongah a um hmasa mi lungfah ruangah BAWIPA PATHIAN leiin tih ding zeihmanh a um lo. Minung le minung bel i hmaizah thiamtu a herh i ralring tein um ve a herh.

2. Unau, rualchan hna nih hmun le inn cuhmi: Ro a co dingmi nih si loin a colo dingmi thilti kho nih ning cang loin Cozah hmangin maw a comi tibantuk hmun le inn cheukhat cu thianh khawh lomi an um ve. Sihmanhselaw BAWIPA PATHIAN nih nangmah kha ” kan peek,” an ti ahcun a thiang ko lai.

HMUN LE INN KA NGEI LO: Hakha khua chuak le Hakha ah a thang i Hakha ah a ummi ka si i hmun siseh, inn siseh ka ngei lo. BAWIPA rian pumpeekin ka tuan ve caah inn hmun le inn ka ngei lo. Hmantlak i ka langhter mi inn khi ka hlaan i, kan umnak le kan thlacam nak inn a si. Hakha ah voihnih in hmun an samh cang i vawlei phung ningin ti ve ahcun, ka hmuh ve hrimhrim ko hnga tiah kaa ruah. Cozah nih hmun an hun samh i inn hmun sok a duhtu hna, zumtu mipi lakah hakkauhnak le duhfahnak thlarau tamtuk a langh tikah ka thlarau nih tel a duh phun zong a si lo i sok duhnak hrimhrim zong ka ngei ve lo.

BAWIPA TU HI KAN INN A SI: Salm 90:1 nihcun,”BAWIPA nangmah cu kan Inn na si zungzal,” a ti bantukin, BAWIPA nih a THLARAU in a kan umpi nak tu hi kan Inn taktak cu a rak si. Apostle Johan cu Patmos tikulh ah innchia thong-inn an pek! Sihmanhselaw BAWIPA a PATHIAN nih a THLARAU in Inn tha taktak a pek i cuka a i a Inn cun Biathlam chung i a hmuhmi vialte khi a hmuh!

Hakha ah hmun le inn ka ngei lo nain, a tu ka inn hlanmi thingrop dohchom inn ka hlanmi te ahhin ka BAWIPA cu ka Inn ah a hung i cang i a ka umpi. A THLARAU cungcih le a THLARAU vanpang le a THLARAU zel a ka phahpiak i a ka huhphenh i a Thluachuah a ka peek! Hakha ah a Rum cem chungkhar kan si ko!

Sohhlua pakhat a ka peekmi kaa ken peng. Cucu, ” a nunnak a sungmi nih a nunnak a hmuh than lai,” timi catial cu a si. Maw PATHIAN mi hna vawlei hmun le inn nan ti nak ah nan thlarau Inn na BAWIPA umpi nak na thet sual maw? Hakhauhnak le duhfahnak thlarau nihcun, BAWIPA nih a kan umpinak kan Inn cu a theh cuahmah ko hi ta! “A nunnak a humhak mi nih a nunnak a sung lai.” timi sohhlua i put in na BAWIPA umpi nak na Inn na theh cu ngol cang tuah.

Credit: Tluang Lian ( Martar)