Chin Miphun A Daw Bak Ti In Ka Ruahmi Nu Elizabeth Thang. Elizabeth Thang hi American Indiana Southern University in Business degree a laak hnu ah MBA zong a peh. American company pakhat nih an sin ah rian ṭuan ding ah dollars tampi lahkhah peek ding in an sawm na in keimah ka ram te ah rianṭuan in kan CHIN miphun huncho ter ka duh deuh tiah a ti hna i kan Kawlram te ah a rak kir mi a si.

A tu ah amah te in Leaf Cafe and Plants ti in eidin dawr kha Yangon lai fang Menegon ah a van thok. A dawr chung ah thiamtahnaak in a chuakmi thawi a phunphun in tahmi puan hna in pangpaar hna a chiah hna. A dawr cu eidin dawr he zong aa lo lo, phun dang te in hmanthlaak naakle video zuknaak tu khi a lo deuh.

A dawr ah hin Actors le Actresses min thang hna le hla sak thiamthiam hna zong an ding ei i hman an i thlaa hna. Video zuk a phunphun in an i laa hna. Cu ka i pangpaar dur tuamnaak ah kan Chin thiamtahmi le thawi phunphun hmuh saknaak a tuah. Ram chungmi lawng si lo in ram dang khual tlawngmi ko hi a dawr ah hin an ṭhing lo. Cu hnu ah BUTIRIA ti in Insein Mayangon, U yee Khee street no 58 ah dawr dang a van thok ṭhan.

Hi dawr a min hi Halkha /Thantlang nih “ SABUTI “ kan timi min kha phun dang te in “ BUTIRIA “ ti in min a peekmi a si. A thlurpi in an zuarmi cu SABUTI cu a si. Aa tinhmi hi kan Chinmi phun rawl hi mi phun dangmi nih thei ve hna seh, ei duh ve hna seh ti in miphun cawisannaak ca ding hrimhrim ah a tuahmi a si. A tuah ning zong hi phun dang te a si i a thaw kho ve taktak. A eimi vialte an thin lung a ton hna i ei ṭhan an duh peng. Chin mi nih fangvui an ei ti in kan rak nih sawhmi hna hi sa thaw taktak mi he pei an ei hi a va thaw tak dah ti hna seh ti khi si dawh a si.

A dawr khan hi kan Chin miphun vialte thil thuam le in chung hmanmi hna hmuh saknaak in a thlai a chiah hna i Funglu le sakhi lu tiang in a thlai. Beng le kho zong a chiah hna. Chinmi nih kan tlaihchan bikmi vakok lungput kan ngeih khawhnaak hnga theihter peng ding ah a dawr luhnaak ah vakok lu a taar. Cu he cun a mi zei paoh hmanthlaak khawhnaak a tuah i cu ko nih cun an lung a laak khun hna.

A tu ah kan Chinmi a mi zei hmanh nih an tuah rih lomi, miphun dang hna zong nih a tuah awk ah an theih khawh bak rih lomi Saimithor ( Aittekbaw) le Memu hang a vun tuah ciamman i a tu hi miphun dang hna nih an duh tuk hringhran. Hi thei hang hna hi a thawt sawhsawh lawng si loin sii ca zong ah a ṭha bak.

Mit kut a thawt ter tuk i tar le upa, nu zawtnaak in a ngawrmi, aa hngilh kho lomi thazaang tlawm le mi ṭawnṭai ca hrimhrim ah cun mit kuh a thawhter i tha a tlun ter ca ah a ttha tuk hringhran. Hi thei pa hnih hi kan Chin ram te in a chuak khomi a si i a tu a mah nih thil man sung tuk i a van tuah hi Chin mi vialte nih thangṭhat lo awk ṭha a si lo. Chin ram a chuakmi Aittek ( Saimithor ) le Memu cu a mah sin ah zuar khawh dih a si cang lai.

Elizabeth Thang hi va zong a ngei rih lomi nu mino te a si rih na in hi tluk in Chin ram le miphun a dawt ning zia hi thangṭhat conglomh awk tlaak taktak a si. BAWIPA PATHIAN nih fimnaak, lunun ngandamnaak le nun khuasaunaak pee seh law a tuahmi thil hna le a ram le a miphun dawtnaak hi thluachuahnaak lianpi he kilveng zungzal hram ko seh. J. P. Biak Tin Sang