Thazaang pe cio hna usih: Nan dam dih hna maw? Pathian dawtnak thawng le ramchung, ramleng ummi dawtu vialte hna thazang nan ka pek cungah ka lawmtuk hringhran. Nanmah thazaang pek nak le dirpi nak thawngin hi dirhmun ka phak khawhnak asi. Tutan kan i zuamnak ahhin mipi leiin vote nan kan pekmi hi a biapit tuk caah nanmah thazaang peknak le thlacamnak he bawmh ka herh rih ko.

Cu lawng si loin phaisa thazaang dih in a ka dirkamh tu hna le caan pek tiangin a ka zohmi nu le pa u le nau cun a ka dirkamh tu mipi nan dihlak cungah ka lawmtuk hringhran. Nanmah dirkhamhnak thawngin le voting peknak thawngin hi dirhmun tiang ka phak khawhnak hi asi. Hmeilei ka caan a tang rihmi zuamnak zongah dawtnak he mipi nih nan ka dirkamhnak le nan thazaang peknak ka herh rih ko, thazaang nan ka pek rihnak lai hi hmun in kan sawm rih ko hna. Ka lawmtuk. sawmnak a tuahmi a tanglei bikah video in zoh khawh si. ‘Love u all Esther 77708′

Relchih: Myanmar Idol hi kum 2016 thawk khan rak thawk si i, a hlawh zong a tling ngaingai. Atu ahcun Eain Mat Sone Yar le Melody Wolrd zuamnak hmanh in a minthang deuh cang. Myanmar Idol hi Shwe Thanlwin Company kal hmangin tuah mi siin, Shwe Thanlwin Company ngeitu hi Daw Nan Mouk Laung Saing asi. Kum 4 chung an tuah cang i, Season 1-4 tiang a um cang. Season 1 ah pakhatnak cu Saw Lah Htaw Wah si i, Season 2 ah Thar Nge asi. Cun Season 3 cu Phyo Myat Aung si.

A cunglei kong he pehtlaiin Myanmar Idol Executive Director Daw Nan Mouk Laung Saing nih cun Myanmar Idol Season 4 kan dih hnu in Idol 4 kan ngei lai. American Idol he pehtlaihnak zong kan tuah lai i, Myanmar Idol Season 1-4 tiang Winner hna cu American Idol zuamnak ah i tel dingin kan nawl hna lai. Kan winner minung 4 hna hi vawlei cung huap zuamnak ah an i tel kho ve lai. cun Myanmar Idol zong hi mah hi kan i tinh bikmi asi,”tiah Press Show an tuahnak ah a chim.

Myanmar Idol Season 4 a zuam mi hna hi an dihlak in minung 30,000 leng an si i, khuapi panga, Taunggyi, Mandalay, Taungoo, Hpa-An le Yangon in thawk asi. hi vialte a zuam mi hna chungin atu ahcun minung 8 lawng an tang cang. A voikhatnak Season 1 a zuam mi dihlak hi minung 8,000 an si i, Season 2 ah minung 14,000, cun, Season 3 ah minung 20,000 nih min an pek.

Season 4 zuamnak ah Director hi Aung Ko Latt si i, Tin Zar Maw hi season 2-3 ah Judge a ttuan cang mi si. Cun, Phyu Phyu Kyaw Thein tu hi tukum lawngin judge a ttuan mi si. Hi kongah Phyu Phyu Kyaw Thein nih a chim mi cu, “Myanmar Idol zuamnak hi ralrin taktak in kan ttuan lai, minthannak le phaisa hmuhnak, nak in hlasak thiam serchuah tu hi kan timh deuh mi asi,”tiah a chim. Myanmar Idol Winner: Myanmar Idol winner simi paoh cu CITY FYM he hmunkhat rianttuan tti dingin hnatlaknak ‘contarct’ an ngei lai i, CITY FYM nih kumnga chung a sponsor hna lai. Amah belte voidang bantuk in mah duh paoh i an um tawn mi kha si ti loin, zeitik hmanh ah anmah nawl in khual an tlawng kho ti lai lo.

Cun, hlasak le show ti bantuk zongah anmah nawl in an tuah kho ti lai lo. Tahchunnak ah kanmah Chinmi chungin pakhat khat hi winner si hna sehlaw. CITY FYM he hnatlaknak ‘contarct’ an ngaih hnu cun US, Australia, Malaysia le ka dang dang um mi nih an sawm hna zongah CITY FYM nih kalnak nawl an pek hna lo cun an kal kho lai lo. CITY FYM sinah theihternak an tuah lai i, tlawnnak nawl an pek hna hnu lawngah an kal kho lai. Cun, Hlasak le show ti bantuk i, a hmuh mi phaisa zong CITY FYM he an i tthen lai. Mah ti kumnga chung an kal tti hnu ah CITY FYM nih album pakhat an chuahpiak ve hna lai.