59 (f) Remh Lo Zong ah DASSK Tamada Si Kho. Mr. Eris Rizung mual a liam cang. Afapa le a monu hna nih Kawlram Mi si nak an sawk a hau. Kawlram mi an si hnu ahcun Pi Ci Tamada sinak pelte hmanh a kham kho ti lo. Mirang holh cun it is finished. Vailam cung ah Jesuh nih kaa lim cang ti tluk tiang in a fek mi bia asi ve. Queen Elizabeth hmanh hlutdaw le Upadi tangah a um. Tamada le adang Luzik / Luchip hna (Power) Anna cu remh duh ah cun 436 kutka in lut a hau.

Pi Ci reng le Anna cu hlutdaw nih suai piak chawm asi. Rem duh le chap duh ah 436 ning in asi lo. Democracy ning in 51% hnatlak nak in fek ter khawh asi. Queen Elizabeth nain Pi Ci tu Anna cungnung deuh mi a ngei. Cu caah 2020 mee hmuh nak caah King or Check an kah pi tu asi tiah an ti phah nak cu asi. Upadi remkhawh asi lo ti an theih ko nain mihrut zang tlaih phun in (Ka ngaithiam hram Uh –hi bia hmang lo awk ṭha ve lo caah) an nawr chih nak aruang cu:

Pi Ci nih Vawlei cung Kings /Queens ah Power sangbik mi Dirhhmun aco caah. Vawlei cung ah SPH a ngeih mi Ramkip (England telin) nih Phunghram pi le Hlutdaw tang ah Kings / Queens cu an chiah hna. State Counsellor (Pi Ci – Rampi ruahnak Cheu tu) cu Phunghram pi tang ah aum lo I Hlutdaw tang ah aum fawn lo. Tamada, VPs hna cu Phunghram pi tang ah a chiah hna. State Counsellor cu upadi tang ah chiah an philh.

Pi Ci cu Tamada asi zong ah A tu a reng tang ah um ding asi caah 59 (f) remh zong ah aa hlei lo mi asi. Cu caah Vawlei cung Hruaitu vial te lak ah Power le Anna sangbik cu DASSK lawng nih a co tiah ti phah nak cu asi. Tamada cu Atu Pi Ci reng he tahchun ahcun Pawte lawng asi ko hen cu. Pawpi kungcung hmin si nak lak ah Pawte si cu Pi Ci nih a duh hrim hrim lai lo. (UPC Rev. Thla Hmung, Hmawngtlang Bia Roling: Ziah Hakha ah nai ṭhial tiah an hal. Khuate I Pawte lu sinak cha cun Khuapi ah Pawpi mei si ai hlawk deuh an kan ti)

ICJ ah abia chimh cia mi tlinter aduh caah asi. Ralkap le USDP kha mipi nih huat hna sehlaw, Zeitik hmanh ah Anna co hna hlah seh timi Tactic he upadi remh an thawk hi asi bik. Phunghram pi remh khawh asi lo (Ralkap tello in) timi hi Pi Ci nih 2010 hlan pi in a theih cang. Mi pi sin zong ah voi 100 reng lo a rak chim cang. 2015 lio ah Phunghram pi kan remh lai tiah Biakam nak kha tlin ter an duh. Remh khawh lo ding mi bia an rak kam sual hna. An mah NLD sual nak kha Ralkap le USDP ah aa ṭhial kho nak hnga Upadi remh in hma an lak ve. Ralkap le USDP cung ah huat nak karh seh ti kha a target cu asi bik.

Upadi remh khawh asi lo ti an theih ko tiah thil sining phundang ngai mi pakhat cu: Azipaw kong mee thlak lio ah NLD palai (30) nih Ralkap lei tu ah mee an pek hna. Khuaruah har ngai ngai asi. Jesuh a thoṭhan lo. Zultu nih Zan ah an fir tiah, Juda Tlangbawi hna nih mipi an thanh hna bantukin Tlangcung mi nih mee an pe lo tiah an merh ṭhan. Ralkap le USDP mee pek lo cu um rih seh. NLD Palai – MP (30) nih Ṭhokkhan mee an pe lo mi nih remh khawh asi lo mi an an remh. Mipi Mithlet an kan piah kan ti nak cu asi fam cuh!!!

Hlutdaw ah NLD nih Naa Kap lente an celh pi hna. Cep an tunh pi hna. Varit than a veh pi hna kan ti lai cu. Zawng te nih dehcawh i hlen lengmang mi Pu Vom tuanbia kha kan hluan. An remh mi Upadi zong cu Pum tlamtlin lo kha, Tlamtlin lo pum tiphun cafang thlen sawh sawh kha asi ve. Tlangcung mi hna nih mee an pe lo mi cu an hal mi 261 kha a tir te ah a hnawn piak hna. Ahnu ah an hmai khap loin an hei ceih cakhong ve caah asi. A phung men in Upadi remh aa timh mi kha zaa ah zaa an theih tuk caah asi. Monzua Aung Sin (NLD Bahu Upa) nih, 2020 thimh nak Tlaitleng caah upadi remh nak hi kan hmang ṭhan lai tiah Vawlei pi theih in a phuan diam ai.

Phunghrampi remh khawh tak tak ding ah; Ralkap bawi zik le Ralbawi hna lungtlin lak in ton ta an herh. Hi hmanh hi Kawlram mi caa lawng ah ṭha. Upadi remh khawh nak bik ding lam sul pakhat te cu: Ralkap, NLD or Cozah asi ding mi, Tlangcung mi Party ti in I tonpumh ta in hna tla nak lak a herh ngai ngai. NLD nih Tlangcung mi cu aphihkarh tuk hna caah 2020 tiang in Hlutdaw le Cozah ah Tlangcung mi nih an duh ning in hmuhhma an co ve lo ahcun: Apoi lo um cang ko seh, Meithal tu kan I tlaih law law lai ti afawi te ve. (Chin lawng Tlangcung mi kan si lo hi mu).

Cu caah 2020 cu Tlangcung mi nih teinak hmuh hrim hrim a herh kan ti nak cu asi. Tlangcung mi kan um lo ahcun Kawlram duhmi le ai tlak mi Democracy phung le Federal Phungphai in mumal an suaisam lai. NCA ah hnatlak mi zong hlutdaw ah upadi in suai ding ti asi khah. Cu caah Tlangcung mi hrim hrim kan um ve aherh tuk cang. Tlangcung mi hna Hmunhma le nawl pek khawh tu cu mipi lawng lawng kan si caah 2020 cu kan lung fim cikcek cang seh, Amen. Credit: Saya Rung Kaw