Myanmar ramchung ah ramdang in a rak tlawng mi cu SAC nih ramchung upadi an tuah mi zulh buin le, ramchung zei bantuk buainak kong hmanh ah i thlak lo ding in SAC ramleng palai zung nih August 5 ah cathanh an chuah. Visa soktu hna ca i rikhiahmi phun 16 chung ah Covid zawtnak i runvennak kong zulh, ramchung thilcang kongkau ah i thlak lo ding in le rikhiahmi hmunram ah sianhnak nawl tel lo in kal lo ding ti bantuk hna telh a si.

Visa soktu hna chung in a ruang tampi ruangah hnonmi zong um khawh a si. Myanmar ram upadi le phungphai an buar a si ahcun dantatnak kan tuah lai tiah SAC ramleng palai zung in a thanh.SAC nih a luancia July 30 ah Japan mi vedio thlatu Toru Kubota kum 20 cu Yangon ah SAC ralkap uk duhlonak langhter in lamzawhtu hna hman a thlak lio ah SAC ralkap nih an rak tlaih. Toru Kubota cu rampi mui chiattertu ti in Section 505(A) le visa dingrep phungbuarnak Section 13(1) in a sualnak an kawl tiah theih asi.

Tanintharyi Ramṭhen Kahdohnak Ah SAC Ralkap 3 An Thi: Tanintharyi ramṭhen, Myait pengkomh Koeinn khua ah nizaan August 7, zaanlei ah rallam a sialtu SAC ralkap le tualchung hriamtlai phu kar kahdohnak achuak. Cu kahdohnak ah cun SAC ralkap 3 an thi, tiah PDF chung tel nih an chim.

August 7, zaanlei suimilam 5:00 in an i kap i, minutes 30 hrawng an i kah hnu ah SAC ralkap nih khuami cheukhat an tlaih hna tiah tual chung mi nih an chim. Koeinn khuami pakhat nih a chimning ah cun SAC ralkap cu minung 70 hrawng an si i, kahdohnak a chuah lio ah hriamngan tamtuk an hman, khuami hna cu zaan ah an zaam dih hna tiah a chim.SAC ralkap hna cu Myaitkhuachung um no.17 le 101 battalion in an si i, khuami cheukhat cu Tamihlan khua lei ah an kalpi hna tiah theih asi.