2020 ELECTION AH ZEI PARTY DAH VOTE(MEE) PEK AWK SI?

 

USDP nih kum 5, NLD nih kum 5 an kan uk pen ko cang caah kawlram ramkhel thilhran cu tampi hmuhtheih cio a si cang. NLD lo ngai cun miphun party men cu kan ti,miphun party cu lal hna hmanhsehlaw central an tlai hlei lo; zeipi an si lai lo tiah kanmah Chinmi lila nih a timi kan um rih, mah nan chim duhnak cu kanmah tein i ukpen kan duh lo, kan I ukpen kho lo e kawlrawn lei nih kan chakmer ko rih uh tiah va sawm khi si,phundang chim ahcun, na kawmtangah na cawpi fa cu cakei nih aseh cuahmah hna i kei le ka cawpi fa nih cakei cu kan tei kho hlei lai lo ti in cakei sinah i ttan riangmang in na cawpi fa cu cakei he nan phomh le seh tti he khin aa lo.

Kum 2020 rampi thim tikah Tlangcung vialte ah khuika tlangcung ahdah NLD+USDP (kawl party) hna an lal te rih hnga timi ruah cio hram thokmi an um len cang bangin Chinmi zapi zong nih kan ruah cio lai dah? Anmah NLD hotu pakhat simi media nih hal lehnak an tuahmi ahkhan tlangcung miphun lakah an lalnak ding hmun a zumh ngaimi ahkhan Chin state le Kaya state ah NLD kan lal rih lai tiah a zumh. Aka cun a chim lo nain NLD an lal lonak ding (teinak an hmuh lonak ding) state a chimmi ahkhan, Kachin, Shan, Mon, Karen le Rakhine states hna ah hin NLD nih teinak an hmuh ding a zumh lonak kha hal lehnak(interview) ah a chim.

Tukum rampi thimnak dingah hin kawlram chung party ngan deuh ti ko usih,Parties 6 an lut lai ti si caah kawl pawl vote (mee) hi aa tthen ngai te lai tiah zumh a um,Turah Shwe Mann party hi party thar ti awk silo; an tthawng ziar kho,USDP nih ceilak mipi vote an hui rih lai pinah 88 lio siangngakchia KoKo Kyi te party nih ceilak vote an hui rih lai caah mipi zumh bikmi le 2015 lio ah lakthlak loin teinak cotu NLD kha an voter a zor dup kho tikha ruah cio ahun si. Kawl ralkap Bochuk hlun pawl party dirhmi cu hei chim duh hlah usih,eibar an chuak tuk theng lai lo caah mu,.

Rampi thimnak dingah tthutdan(333) leng hmuh ahauh caah NLD nih 2020 thim tikah cun 2015 lio bang an cak lai lo tikha 70% zumh deuhmi a si caah MIPHUN PARTY hna caah caanttha taktak asi caah tlolh lo in miphun party lal ter hna hau.

A ruang: Kawlram party ngan pahnih NLD le USDP nih Cozah an ser khawh lai lo caah tlangcung miphun party teinak hmu mi hna sinah Cozah sertti dingin kut an rak dawh te lai caah mah cucu Miphun party le tlangcung miphun caah caanttha taktak cu a si. I uah kho sive cang lai,tlangcung miphun sinah cucu khakha nan kan pek le tuah piak ding si ahcun Cozah kan in serpi hna lai tiah kutsih bu in thlahuar in rak leh men hna ding si hnga.

Kan ram Vakok lennak chumtual ah Kawlva kawl thantar (flag) nih tthutnak a lak rih ahcun kan duhmi le kan co ding kan sungh lai pinah duh poh in kampau ding kha kan ngei ti lai lo,kan luthlung in an ek an kan ek chap rih lai. Kawlram ah miphun party teinak hmumi kha zeitluk in dah an upat hna kha; 2008 phunghram thlennak komiti ah luhter an si I teinak hmu lo party cu an luhter duh hna lo khah!

Rampi pakhat hruainak dingah phunghram (constitution) abipi bik tikha zapi theih asi bang,tulio hi 2008 phunghram remh timh cuahmah si tikah Chin miphun aiawh in palai kan ngei kho lo, cucu kanram cia ah kawl party kan lal ter caah a si. Teinak hmu lo party cu innka hram zong lam hlah uh an ti huar,hodah a el kho, zatlak sazoh in zoh men kha si caah lungfak tuk a si.

Chinram Cozah tlaitu cu kawl an si ttung lo,Chinmi lawngte deuh pei an si ko tiah nan ti men hnga, amipum theng kha chimduhmi silo, remote control btk in an hun hmeh mi hna tu khi a si. NLD hi miphun party silo, kawl party a si ko; kawl party silo tiah a chimmi Laitlai hna khi cu velhle thiam anka nem thiammi an si.Velhle aa zumh lengmang mi nungak cu lakfa an pawi. Velhle aa zumh lengmangmi tlangval cu nupi tong loin valttul an si.

Tulio Tlangcungmi nih kan herhmi cu facang, chiti, ngapih le cihliah kha a rih silo; kanram cia ah hohmanh an duhtawk in an kut lek hna hlahseh, kanmah tein kan i zohkhenh lai, kan i tawlrel kho ve cang tikha hmakphek le cite rial in a kan rial tu sinah langhter a herh lio caan si.

Credit: William HC