2020 thimnak ah NLD Party nih Cozah a tlaih than ahcun Federal khuapi kan lut kho. NLD cozah nih aa tinh ning tein rian a tuan i a tlam tlinh lo mi tampi a um ko. Cucu el awk a tha lo nain 70% cu a tuan ti in ruah khawh a si. A bik in Phunghram remh le Tlang Cung mi hna duh herh mi federal zauk phung kong zong ah siseh, NLD cozah nih dai tein kaar an hlan mi zoh tik ah a term hnih nak ah cozah an tlaih than ahcun federal khuapi kan phan kho ti hi ruah khawh a si.

Suu Kyi nih ralkap hi a doh le kalh phun si loin anmah he naih niam tein in um i i chawnhbiak hnu ah NLD nih a chim tawn mi zauk phung kha lak ding aa timh mi a si. Hluttaw ah ralkap 25% um hna hlahsehlaw aa olh tuk hnga. NLD cozah nih ralkap he term khat chung an i chawn bia ko cang, Ralkap nih an duh mi zong hngalh a si i a hlei in Tlang cung mi sining zong an hngalh deuh ve cang tik ah khuakhan lairel cu a fawi deuh tuk cang lai.

Duh mi zauk phung hmuh nakding ah i doh le i al nak in hmuh cu a fawi lo. cu ruang ah remhdaihnak NCA zong cu thawk a si. Remhdaihnak lawng nih a tha mi zauk phung lak,i pek le thenh khawh a si. NLD cozah nih Federal hi remdaihnak lam thluan in lak a timh i term khat chung ah timhtuahnak tha a ngei cang. A term hnih nak cozah a tlaih than ahcun a term hnih nak a kum thumnak hrawng ahcun federal Democracy theipar taktak kan tep cang lai ka zumh.

Term hnih chung i cucu aa tuha lo lam ahcun Party dang nih an soisel mi hi a dik tiah 100% zumh bak ding a si ve. Zei rian tuan poh le tuan lai poh ah timhtuahnak hi a biapi tuk. Timhtuahnak tha lo cun hlawhtlin a fawi lo cu mu, term khat chung aa timh tuah mi theipar cu a term hnihnak ah theipar a tlai hrimhrim lai zumh a si ko cang.

Hi ruang ah hin Federal uknak a duh mi nih kan duh mi zauk phung lam kan zawh lio ah rian rangtuk in lamzawh hlah usih, chuih pah sual a tam. Cucaah mipi zong nih nan tha chiat ding a si lo. Federal khuapi chung luh tuan na duh ahcun na vote kha apingpa lo ah bung sual lai ci.Credit:The Voice Of Democracy