2020 thim tikah keicu CHIN Party Vote ka pek ko hna lai ( Pupa chan in kan mah tein kan ram aa kilven ngam mi kan si, midang kan i bochan bal hna lo).

Chinram cu Kawlram le India ram karlak ah Kawl le India nih an uk bal lo mi ram arak si. Chin ram cu 1889 kum thawk in mirang nih Uk a rak kan timh, nain kan pu pa hna nih mirang nih uk an rak duh lo caah Mirang cu fahpi in an rak doh hna. Chin ralkap nih mirang cu ral an tei hna lo caah akhua le a tlangkip Chin uktu bawi pawl tampi an rak tleih hna i Shanram Lashio thawng ah an rak chiah dih hna.

Pu Zo Tum Hmung nih a chim ning ahcun 1885 ah Mirang nih Kawlram adihlak in an vun tei i Chinram cu 1892 ah a vun lak ve. 1895 cun tha tein an vun uk khawh cang hna. Mirang nih an dohhlat cikcek hnu ah “Chin Hills Regulation-Laitlang uknak upadi)” ti mi uknak Upadi a tuah i Kawl le India he fonh loin a dang tein a rak uk hna tiah arak ti.

Mirang ral daih hnu hnatlaknak cu Chin Hills Regulation 1896 tiah Mirang cozah nih upadi ah an ser. Cu upadi chunga, Lushai, Kuki, Naga, tlangcung khuasami Chinmi le Chin nunphung le holh a hmangmi hna mi zeipaoh, an i tel dih, tinak a si; cu upadi nih Chin miphun hi mi zeidah kan si ti kha a sullam an rak fianter ngaingai.

Cu caah tutan kawlram pumpi i thim tik zongah Chinram le Chin miphun nih midang party bochan in ram kan sersiam lai timi lungput ngeih ding a si hrim lo. NLD le USDP parties nih Chin ai an kan awh kho hrim lo. Kan khel mi hi Development ( thanchonak) pakhat lawng a si lo. Kan khel mi hi Nation Peace (ram pumpi diahnak) deuh tu a si rih. Kan ram a him le a daih a si ahcun Development pawl cu automatically in arak ra colh ko lai. Cu caah Changreu cu a thaw le thawt lo theih taktak nan duh ahcun nan ei ta hrimhrim a hau” cu ve bantuk in Chin Party an rian ttuannak le an thil ti khawhnak nan thei duh tak an si ahcun mee nan pek ve ta hrimhrim hna an hau.

Note: Acung lei reference khi Pu Lian uk nih arak chim mi zoh chih in tial nolh than mi a si.

Credit: Bawi Hlei Hu