2020 Chin Ramkhel Zuamchawhnak- Ram Tinthei

Chin News

2020 Chin Ramkhel Zuamchawhnak: Tutan 21st Century Panglong Civui ah ramkhel party le hriamtlai, Cozah, Ralkap tiin an party le an bu hmuitinh policy an chim cio hna. Asinabel in Chin minkeng Chin political parties hna; Chin National Democratic Party (CNDP), Chin Progressive Party (CPP), Chin League For Democracy (CLD), Asho Chin National Party (ACNP) an aw aan a langhlo le an muihmai a langhlo cu nan lung a tha cio lailo dah. A dangdang Chin local tribal party hna ENDP, ZNRDP, KNP te pawl cu um rih seh.

Image may contain: 6 people, people sitting and indoor

Kawlram tlangcungmi hna lak ah theihbal huahalo miphun party hme tete hna; Lisu, Kokang, Pa-O, Ta Ang, Wa, Zomi ti pawl hmanh donhhlei sang cung an hung kai i an party policy an chim cio. Thutnak co cu si hna kaw a hmaitlar ah thutnak an co. An hmai a hngal zia le an kut thui a that hmanh an kan pah dih lai ti awk in. Miphun aiawh hrat cu Ralkap le Kawlte hrim zei ah an rel ve hna lo.

Kawlholh pei nawn tete, an duh ning hmanh fiang in a chim kho huahalo tete, tar tuanbia maw ka chim party policy dah ti hmanh a theilo tete an hung chim cio hna. Huam zong huamlo zongah ngeih piak an si. Ram riah ah savo a hme a ngan ti a umlo, mahle tinvo phawtmi cio he tlun cio asi. An covo asi, an caan asi, minutes 10 chungah an duhmi khoih in chimnak nawl pei an ngeih fom cu.

Image result for 2020 myanmar election

Culak ah fimthiamnak le theihhngalh in zahpilo kan pale; Pu Zo Zam, Pu No Than Kap, Salai Ngai Sak nan aw-aan theih kan duh ve ko hna. Kan hung hlam ruangmang hna. Khoi hen nan si ne. Nan party policy theih kan duh ve ko tung. Rampumpi hriamtlai phu vialte, ralkap bawi rual, Cozah lutlai hna, ramkhep party vialte hna hmai ah kan pale muihmai lang seh ti kan duh ve ko. Vawleicung international level in nan fimthiamnak le nan thilti khawhnak quality in hmu hna seh ti kan duh ve.

Biachim nan thiam zia, nan umtu hoiher aa dawh zia, nan pumrua that le nan muisam dawh zia miphun dang hmai ah in chorh kan in duh ve hna. Nanmah pathum nih Chinram chimlo Kawlrampi hmanh a lutaw letthal kho fimthiamnak nan ngeih ve ko tung. Cawisan zia maw kan in thiam hnalo, cawisan tlak dah nan si lo. Nguingui thlak in, in tahpi hna ka duh.

1947 Panlong Conference puaipi ah Chinmi kan pale pathum Pu Kio Mang, Pu Hlur Hmung, Pu Thawng Za Khup hna nih hngal ngaiin bia an ram chim. Aung San cu kawl aiawh, kan pale zong Chin aiawh. Miphun puitling aiawh ciocio an dirhmun aa khat. Atu Daw Suh an tih i a hmai an kun bang hi a rak silo. Kan pale nih Aung San hrim an rak tih lo. An kut cungah Chinram le Chin miphun chiatnak thatnak vialte a rak um. An minthut cafung dehkhat nih lai a rel.

1947 lio i kan pale cu fimcawnnak ah catang sang an rak awnglo. Ramkhel ah an theihhngalhnak a tlawm. Si hmannhsehlaw, Pu Ngai Sak, Pu No Than Kap, Pu Zo Zam; fimnak thiamnak ah puitling nan si. Vawleipi hmai ah chuahpi ngamtlak pasaltha nan si ve ko. Kan miphun kan sining a theibiktu nan si. Ziah tutan ah kan pale khoi hen nan si. Tho than tuah uh, isersiam than tuah uh, kan hruai than tuah uh, nan biartung let uh.

Credit: By- Ram Tinthei

Leave a Reply