Nan theih le hngalh ciomi, itheihter lo zong ah theihlo ngah lomi cu; NLD nih 2008 phunghram remh ding in hluatdaw i an von chuahpi bak ahkhan ralkap le USDP party nih pohmah 261 remh ding an ti cawlh ve khah. Angaite tiah cun NLD nih phunghram remh ding an ti ahhin pohmah 261 cu an remh tuk dingmi si. NLD nih pohmah 261 remh an duhlomi cu kahlo salu phurh an itim cu maw si taktak hnga – ṭha tein ruah ahau.

NLD nihhin ralkap ṭhutdan 25% asimi phunghram hi remh khawh asi ṭunglo vevek ahcun pohmah 261 zong hi remh an duh loh. NLD nihcun ralkap le USDP thluak hi ahngalh tuk. NLD nihcun pohmah 261 hi remh vevek ahcun ramṭhen le ramkulh Chief Minister (CM) hna cu rammi mipi nih thimmi MP chung in si hna seh ti kha an duhmi si. Nain ralkap le USDP nihcun khakha an duh loh.

Rammi mipi nih thim lomi chung zong in CM (Vuancichoh) zong ṭuan khawh siseh timi an duh. NLD party nih Chinmi an kan huat tuk ruang ah 261 pohmah thlen/remh an duhlonak hi asi lo i, ralkap le USDP party nih Chinmi an kan dawt tuk le zawnruah tuk ruang ah pohmah 261 thlen le remh an duhmi hi asi hlei pek fawn loh. Zeiruang ahdah USDP le ralkap nih pohmah 261 remh le thlen cu an duh. Ralkap cu ṭhutdan 25% an ingeih cia cang. Cutik ah ramkulh le ramṭhen pawl ahhin ifonh riangmang in Chief Minister va si khawhnak ding an iruahchan.

Cucaah 2008 phunghram ralkap ṭhutdan 25% hi an remh vevek ṭunglo ahcun pohmah 261 hi tawng bak ve hna hlah seh. Azoh zong zoh hna hlah seh. Aruat zong ruat hna hlah seh tihi kei ka duhnak le ruahning si. Credit: Lian Bawi